Alas Kwatro Ako Gumising Kaninang Umaga

by Psalmir Feliciano Barrios

Binusalan ang sarili para manatiling humihinga
Dumaing kung ‘hanggang kailan kaya?’
Hindi matatapos aking pagsagupa
Hindi ako handang kamayan ang pagkalupig

Ilang daang libong inabandonang kaluluwa
Umaawit mula sa hawlang guniguni
Karamay sa aking paghikbi
Pagtapos mangilala ng latay sa kanilang mata

Nilulon ang pinaghalong dugo, pawis at luha
Banlawan ang lasang kumapit na sa dila
Yapos ng apoy sa baga
At halik sa talampakan ng emperador

Tanikala ng tadhana ang aking katunggali
Paglaban ang aking panata
Dasal ang aking paglimos
Para sa nabubuwal na bubog ng basag na bahaghari